Friday, 24 November 2017 09:36

TAMWA KUADHIMISHA SIKU 16 ZA KUPINGA UKATILI WA KIJINSIA

Written by

Chama cha Wanahabari Wanawake nchini- TAMWA kinaungana na mashirika mengine yanayopinga ukatili wa kijinsia na kutetea haki za binadamu kuzindua maadhimisho ya siku 16 za kupinga ukatili wa kijinsia.

 Uzinduzi wa maadhimisho hayo yataanza kesho tarehe 25 Novemba na kufikia kilele tarehe 10 Desemba, 2017. Kauli mbiu ya maadhimisho ya mwaka huu ni “Funguka!  Ukatili Dhidi ya Wanawake na Watoto Haumuachi Mtu Salama. CHUKUA HATUA”, kauli mbiu hii inatukumbusha wote wazazi, walezi, ndugu, jamaa na jamii kwa ujumla kushirikiana na serikali kuvitolea taarifa na kuvichukulia hatua stahiki vitendo vya ukatili wa kijinsia kwa wanawake na hasa watoto wa kike ambao wanakumbana na vishawishi na vizuizi ambavyo aghlab husababisha ndoto zao kutotekelezeka.

 TAMWA kupitia kitengo chake cha Usuluhishi cha CRC, kimebaini kuwa ukatili wa kijinsia hasa ubakaji umeongezeka kwa watoto kwani katika kipindi cha miezi minane  kuanzia Mwezi Januari hadi Augusti mwaka 2016 kesi zilizohudumiwa katika kituo hicho zilikuwa ni 9 wakati kwa kipindi kama hicho hicho mwaka huu 2017 vitendo vimeongezeka na kufikia 57 kwa vigezo vyovyote vile, ukatili unatisha.

 Taarifa ya tathimini ya utendaji kazi ya Kituo cha One Stop Centre cha Hospitali ya Amana, Dar es Salaam imeonesha kiwango cha ubakaji kwa mwaka huu kiko juu kwa idadi ya watoto 141 walio chini ya umri wa miaka 18 ukilinganisha na idadi ya watu wazima 27.

Aidha taarifa hiyo imeonyesha kuwa kuanzia Julai 2016 hadi Juni 2017 wanawake 168 walibakwa. Kituo hicho pia kimehudumia jumla ya waathirika 420 ambapo kati ya hao watoto ni 316 sawa na asilimia 75 na watu wazima ni 104 sawa na asilimia 25 ya ukatili wa kijinsia.

 Taarifa hiyo aidha imeonyesha kuwa idadi ya waliolawitiwa na kuripoti katika kituo hicho ni 44 sawa na asilimia 10.47 kati ya hao watoto ni 39 ukilinganisha na watu wazima ambao ni 5 kwa mwaka. Hali hii ya ukatili iko juu sana kwani watoto waliofanyiwa vitendo hivi wana uwezekano mkubwa wa kuwafanyia wengine katika kipindi cha makuzi yao.

 TAMWA inaamini kuwa jukumu la ulinzi na malezi bora kwa watoto ni la jamii nzima wakiwemo marafiki, wazazi, ndugu, walezi, majirani na viongozi tukishirikiana na serikali kuboresha na kusimamia utekelezaji wa sera na kubadilisha sheria kandamizi ili wahusika wa ukatili huu hasa kwa watoto wa kike wawajibishwe kwa mujibu wa sheria. 

 Siku 16 za kupinga ukatili wa Kijinsia ni kampeni  ya Kimataifa  inayoongozwa na Kituo cha Kimataifa cha wanawake katika uongozi tangu mwaka 1991 kutokana na mauaji ya kinyama ya kina dada wa Mirabelle yaliyofanyika nchini Dominica mwaka 1960. Mwaka 1991 Umoja wa Mataifa (UN) ulichagua Novemba 25 iwe siku ya Kimataifa ya Kupinga Ukatili wa Kijinsia ambapo kilele chake huadhimishwa Desemba 10 ya kila mwaka.

 

 Edda Sanga

Mkurugenzi Mtendaji

Matukio ya ajali za barabarani yamekuwa na athari nyingi hapa nchini kiuchumi na kijamii. Vilevile matukio haya ya ajali za barabarani yamekuwa yakiwasababishia wananchi madhara makubwa yakiwemo kupoteza maisha, majeraha makubwa, ulemavu wa kudumu, mali kuharibika ikiwa ni pamoja na kuacha familia nyingi zikiwa tegemezi baada ya kuondokewa na watu wanaowategemea.

 Takwimu zinaonyesha  kuwa takribani watu milioni 1.25 duniani hufariki kila mwaka kutokana na  ajali za barabarani, aidha,  watu milioni 20 mpaka 50 hupata ulemavu. (Hii ni kutokana na takwimu za Shirika la Afya Duniani (WHO). Kadhalika sehemu kubwa ya vifo na  madhara ya ajali hizi zimetokea Kusini mwa Jangwa la Sahara , Tanzania ikiwa moja ya nchi hizo.

 Takwimu pia zinaonyesha kuwa ajali nyingi zinatokea sababu ya makosa ya kibinadamu hasa uzembe wa madereva ambapo kwa mujibu wa taarifa za jeshi la polisi, nchini Tanzania asilimia 76% ya ajali barabarani husababishwa na uzembe wa madereva, asilimia 8% husababishwa na ubovu wa barabara. Aidha ubovu wa vyombo vya moto husababisha ajali kwa asilimia 16%.

 Hata hivyo ajali nyingi zinaepukika kama madereva na watumiaji wengine wa barabara watazitii sheria na kanuni  za Usalama barabarani.

 Kutokana na ajali hizo kuongezeka ndio maana ikatengwa siku maalum ya kimataifa ya kuwakumbuka waathirika wa ajali za barabarani kila mwaka ambayo huadhimishwa kila ifikapo Jumapili ya tatu ya Novemba ya kila mwaka. Kauli mbiu ya maadhimisho ya mwaka huu ni “Ifikapo 2020: Kupunguza vifo na ajali za barabarani kwa asilimia 50%”.

 Siku hii inatambulika kama siku rasmi ya kimataifa ya kuwakumbuka waathrika wa ajali hizo na familia zao na kuzitaka nchi wanachama pamoja na jumuiya za kimataifa kuitambua siku hiyo.

 Pia siku hiyo hutoa fursa kwa jamii nzima kukutana na kuwakumbuka wahanga wa ajali za barabarani ,kutafakari madhara, gharama, na hatua zinazoweza kuchukuliwa katika kuzuia ajali zisitokee. Vilevile siku ya kuwakumbuka wahanga wa ajali za barabarani inatoa nafasi kwa wadau kuikumbusha serikali wajibu wake na jamii nzima katika suala la kuzifanya barabara kuwa sehemu salama kwa kila mmoja.

 Hivyo basi mtandao wa wadau kutoka asasi za kiraia unaotetea marekebisho ya sheria na sera ihusuyo usalama barabarani pamoja na mambo mengine katika kuadhimisha siku hii tunaisihi serikali na watunga sheria kuifanyia maboresho sheria ya Usalama barabarabi ya mwaka 1973 ili iweze kukabiliana ipasavyo na suala la ajali za barabarani pamoja na athari zinazotokana na ajali hizo

 

Maeneo ndani ya sheria ambayo mtandao huu utajielekeza kuona sheria inafanyiwa mabadiliko/maboresho ni pamoja na;

 

a)      Matumizi ya mikanda na vizuizi vya watoto; Sheria ya sasa ya Usalama barabarani inasema ni kosa kisheria kwa dereva na abiria anayekaa kiti cha mbele kutokufunga mkanda wakati wa safari lakini sheria hiyo hiyo haisemi chochote kwa abiria wanaokaa kiti cha nyuma.

 Utafiti uliofanywa na Shirika la Afya Duniani (WHO) unasema kuwa iwapo ajali ikitokea madhara/athari kwa abiria wa kiti cha mbele itapungua kwa 50% na kwa abiria wa nyuma madhara yatapungua kwa 70%. Kanuni zilizotungwa na SUMATRA zinataka abiria wote wafunge mkanda ila kwa vile sheria mama (Road Traffic Act of 1973) ipo kimya katika eneo hili utekelezaji wa kanuni unakuwa mgumu.

Hivyo basi ni rai yetu sheria hiyo ibadilishwe na kuwataka abiria wote wanaokuwa katika chombo cha usafiri wa kibiashara au binafsi kufunga mkanda wakati wote wa safari.

 Kadhalika sheria yetu ya sasa ipo kimya juu ya suala la vizuizi vya watoto katika vyombo vya moto hasa Kwa magari binafsi (private cars) na tumeendelea kushuhudia madhara makubwa katika ajali zilizohusisha watoto vikiwemo vifo.  

b)      Matumizi sahihi ya kofia ngumu; Sheria ya sasa ya usalama barabarani inasema kuwa ni kosa kwa muendesha pikipiki kutokuvaa kofia ngumu wakati wa kuendesha chombo hicho. Lakini sheria hiyohiyo haisemii chochote kwa abiria anayepanda katika chombo hicho. 

Vilevile pamoja na kuanishisha kosa kwa dereva wa pikipiki kutovaa kofia ngumu lakini pia sheria haielezi ni jinsi gani kofia inatakiwa kuvaliwa na aina maalum ya kofia inayotakiwa kuvaliwa.

Kwa mujibu wa Utafiti wa Shirika la Afya Duniani (WHO)  unaonyesha kuwa iwapo ajali itatokea madhara yanayotokea kwa kutovaa kofia maalum na kwa usahihi ni makubwa sana ukilinganisha na kofia hiyo ikivaliwa na kwa usahihi. Hivyo basi ukizingatia kuwa sasa hivi usafiri wa pikipiki umekuwa unatumika kwa kiasi kikubwa (public transport) hivyo ni rai yetu sheria hiyo ifanyiwe maboresho na kuweka kuwa ni sheria kwa mtu yoyote anayepanda pikipiki kuvaa kofia ngumu na kwa usahihi.

c)      Matumizi ya vilevi na uendeshaji vyombo vya usafiri: Sheria ya sasa ya usalama barabarani inasema kuwa itakuwa kosa kwa mtu yoyote kuendesha chombo cha moto akiwa na kiwango cha kilevi katika damu yake kinachozidi asilimia 0.08% katika mfumo wa mwili. Kiwango hiki ni kikubwa sana kikilinganishwa na tafiti zilizofanywa na Shirika la afya duniani na kupendekeza kiwango asilimia 0.05% kwa dereva aliyebobea (experienced driver) na asilimia 0.02% kwa dereva  mchanga (young driver). Hivyo basi ni rai yetu kuwa sheria ifanyiwe marekebisho ili iendane na kiwango cha sasa cha kimataifa kilichofanyiwa utafiti.

d)     Mwendo kasi (Speeding): Mwendokasi umeendelea kuwa sababu kubwa ya ajali zinazogharimu uhai wa watu wengi. Sheria yetu inayo mapungufu kadhaa pamoja na juhudi nyingi za Jeshi la Polisi na wadau wengine kutaka kudhibiti jambo hili lemeendelea kuwa tatizo. Adhabu zisiszokidhi wala kuleta hofu kwa maderava wasiotaka kutii zimeendelea kufifisha juhudi za kudhibiti tatizo hili.  Mfano Sheria  ya usalama barabarani ya 1973 Kifungu cha 51(8) inatambua maeneo machache katika kuzuia mwendokasi, ni muhimu Sheria itamke maeneo yote na si yale ya mjini tu au makazi, itamke wazi kuhusu maeneo ya shule, nyumba za ibada, maeneo ya michezo na mbuga za wanyama.

Umoja wa Mataifa na Shirika la Afya Duniani wanakiri kwamba sheria  madhubuti zinahitajika katika kupunguza idadi ya watu wanaokufa katika barabara zetu. Tanzania lazima tuwe na sheria kali za usalama barabarani kukomesha hali hii. Tunatoa wito kwa watunga sera na wabunge kuwalinda wapiga kura wao dhidi ya ajali na majeraha yatokanayo na ajali za barabarani kwa kuunga mkono na kupitisha marekebisho ya sheria ya usalama barabarani ya 1973.

 

TAMKO HILI IMETOLEWA LEO NA MTANDAO WA WADAU KUTOKA ASASI ZA KIRAIA UNAOTETEA MAREKEBISHO YA SHERIA NA SERA IHUSUYO USALAMA BARABARANI TANZANIA: TAWLA, TAMWA, WLAC, TCRF NA TLS.

Page 1 of 21

VISITORS COUNTER

1461041
Today
Yesterday
This Week
Last Week
This Month
Last Month
All days
572
722
3529
9251
5319
1380
1461041

Your IP: 54.163.61.66
2017-12-15 19:46

OUR VIDEOS

FOLLOW US ON FACEBOOK

FOLLOW US ON TWITTER