Press Released

User Rating: 0 / 5

Star InactiveStar InactiveStar InactiveStar InactiveStar Inactive

Ndugu Wanahabari,

Awali ya yote namshukuru Mwenyezi Mungu, kwa kunijalia uzima, afya njema na kuniwezesha kukutana nanyi ili niweze kuongea na watoto, wazazi/walezi na jamii kupitia kwenu wanahabari kuhusu Maadhimisho ya Siku ya Mtoto wa Afrika kwa mwaka 2020.

Ndugu Wanahabari,

Tarehe 16 Juni, ya kila mwaka, Nchi wanachama wa Umoja wa Afrika ikiwemo Tanzania huadhimisha Siku ya Mtoto wa Afrika. Chimbuko la maadhimisho haya ni mauaji ya watoto takribani 2,000 yaliyofanywa na Utawala wa Makaburu katika Kitongoji cha Soweto, nchini Afrika Kusini tarehe 16 Juni, 1976. Mauaji hayo yalitokea wakati wa maandamano ya wanafunzi waliokuwa wakipinga mfumo wa elimu ya kibaguzi nchini humo. Mwaka 1991 viongozi wa Umoja wa Nchi za Afrika walifanya uamuzi wa kuienzi siku hiyo ikiwa ni kumbukumbu ya mauaji ya watoto hao. Maadhimisho haya yanatumiwa na wadau wote katika nchi za Afrika kutathmini ya hali ya upatikanaji wa haki na ulinzi kwa watoto kwa lengo la kuboresha ustawi na Maendeleo ya watoto.

User Rating: 0 / 5

Star InactiveStar InactiveStar InactiveStar InactiveStar Inactive
Mheshimiwa Mgeni Rasmi Mkuu wa Mkoa Wa Mjini Magharibi,
Waheshimiwa Maaskofu, Masheikh, Wachungaji na viongozi mbalimbali wa dini.
Waheshimiwa viongozi wa vyama mbalimbali vya siasa, viongozi mwa serikali, wakuu wa vyombo vya usalama na taasisi mbali mbali.
 
Itifaki imezingatiwa!
 
Tunaanza kwa salamu maalum isemayo:
 
Dini mbalimbali, Amani na Upendo, Amani na upendo, Dini mbalimbali.
 
Awali ya yote tuchukue nafasi hii kumshukuru mwenyezi Mungu aliye mwingi wa rehema kwa kutujalia afya njema hata kuifikia siku hii ya leo tukiwa wazima na kukutana kwa pamoja viongozi wa dini na viongozi wa vyama vya siasa kwa ajili ya Warsha hii muhimu kwetu sisi na Taifa letu pendwa la Tanzania. 
Mheshimiwa Mgeni Rasmi, Kamati za Amani tunachukua nafasi hii kwa upekee kuwashukuru wenzetu wa Chama cha Wanahabari Wanawake Tanzania (TAMWA) kwa kuona umuhimu wa viongozi wa dini katika kutoa mchango wetu kwa viongozi wa vyama vya siasa na jamii hususan juu ya nafasi ya mwanamke tunapoelekea katika uchaguzi mkuu Oktoba, 2020.
 
Ndugu mgeni Rasmi, lengo la Warsha hii pamoja na kuielimisha jamii juu ya umuhimu wa kufanya uchaguzi wa haki, kuheshimiana, amani na utulivu lakini pia ni kuona ni kwa namna gani jamii inapaswa kuzingatia umuhimu wa kuchagua viongozi  wenye sifa, ikiwamo kuzingatia nafasi ya mwanamke. 
 
Ndugu mgeni Rasmi na wana warsha, ni ukweli ulio wazi kuwa wanawake wamekuwa wakikabiliwa na changamoto mbalimbali hasa katika uwakilishi wa nafasi za uongozi kutokana na mfumo wa dume uliojengeka miongoni mwa jamii. Hatusemi wapewe tu uongozi kwa sababu ni wanawake bali kwa uwezo walio na ufanisi walionao. 
Wengi tunashuhudia sehemu kubwa ya jamii inamwangalia mwanamke kwa dhana tofauti na wakati mwingine kumtolea hukumu na kuonekana kama kiumbe kisichoweza kuleta maendeleo katika jamii yake. Jambo lililo kinyume hata na mafundisho yetu katika vitabu vyetu vitakatifu. 
Kwa mfano, maandiko ya Biblia yanashuhudia kwamba katika historia ya ukombozi kutoka Agano la Kale, hadi Agano Jipya tunaiona nafasi ya mwanamke jinsi alivyoshiriki katika utume na kukamilisha historia ya ukombozi wa mwanadamu kama tunavyoweza kuona  mifano mbalimbali ya wanawake jasiri na wenye uthubutu kama vile; Debora, Ester, Mariamu Magdalene na wenzake. Pia Qur’an tukufu nayo inasisitiza.
Kwa mujibu wa Sensa ya Watu na Makazi ya Mwaka 2012, takwimu zinaonyesha wanawake ni zaidi ya asilimia 51. Hata hivyo, ni asilimia 30 tu ya wanawake wanaoshiriki katika uongozi kwenye vyama vya siasa, Serikali, Bunge, Mahakama na katika nafasi nyingine za uongozi katika jamii.
Sote tunafahamu Tanzania imeridhia Mikataba na Matamko mbalimbali ya Kimataifa yanayotoa haki kwa kila mtu kushiriki katika utawala wa nchi, haki za kisiasa na kiraia na mingine inayotoa miongozo ya ushiriki sawa wa kijinsia. Hii ni pamoja na Tamko la Kimataifa kuhusu Haki za Binadamu (UDHR: 1948), Mkataba wa Kimataifa wa kutokomeza aina zote za ubaguzi dhidi ya wanawake (CEDAW: 1979, Ibara namba 7: a,b na c).
Mapendekezo ya Baraza la Usalama la Umoja wa Mataifa (UNSC 1325(2000) Mpango Kazi wa Beijing (1995), Malengo ya Millenia ya Maendeleo (Lengo la 13), pamoja  na Mkataba wa Afrika kuhusu haki za Binadamu ikiwa ni pamoja na Mkataba wa Ziada wa Maputo.
Katiba ya Jamhuri ya Muungano wa Tanzania (1977) pamoja na mapendekezo ya Katiba Mpya ya Jamhuri ya Muungano wa Tanzania (2014/15)pamoja na Sera ya Maendeleo ya Wanawake na Jinsia (URT: 2000) zimebainisha haki za wanawake kushiriki katika nafasi mbalimbali za uongozi. 
Hata hivyo, pamoja na dhamira ya Serikali ya kufikia usawa wa kijinsia katika uongozi yaani 50 kwa 50, hali halisi inaonyesha bado wanawake wako nyuma katika nafasi za uongozi. 
Mkuu wa kitengo cha Wanawake katika Umoja wa Mataifa, Phumzile Mlambo-Ncguka, aliwahi kusema “Usawa baina ya wanawake na wanume ni ndoto ambayo bado inakwepwa” 
Ni katika mazingira hayo sisi Viongozi wa Dini na Viongozi wa Kamati ya Amani tupo mstari wa mbele katika kuhamasisha jamii  kuona umuhimu wa kutekeleza kwa vitendo juu ya nafasi ya uongozi kwa mwanamke.
Zipo sababu nyingi zenye kumkwamisha mwanamke katika nafasi ya uongozi na moja kati ya vikwazo vya mwanamke kupata uongozi ni mfumo dume ndani ya vyama vya siasa. 
Imebainika kwamba, vyama vingi vya siasa vinawatumia wanawake katika shughuli za uhamasishaji katika kuongeza idadi ya wanachama na kueneza sera za chama ikiwemo wakati wa kampeni katika kuwavuta wapiga kura lakini kwa asilimia kubwa haimuoni mwanamke kama ni mdau kwa ajili ya nafasi ya uongozi na kushika nafasi ya nguvu ya kimaamuzi.  
Vikwazo hivi  ni pamoja na nguvu ndogo ya mwanamke kiuchumi, rushwa, lugha dhalilishi, mila potofu, na wakati mwingine hii imesababisha baadhi ya wanawake  washindwe kujiamini katika kukabiliana na vitendo mbalimbali vya ukatili wa kijinsia.
Hata hivyo pamoja na changamoto hizo sote tumekuwa tukishuhudia namna ambavyo wanawake kadhaa ambao walipata fursa ya kuongoza waliweza kuongoza kwa ustadi na weledi mkubwa wakati mwingine kuliko hata wanaume. 
Miongoni mwao ni Makamu wa Rais wa Jamhuri ya Muungano wa Tanzania, Mama Samia Hassan Suluhu, Spika wa zamani wa Bunge, Mama Anna Makinda, Aliyekuwa Naibu Spika, Dk. Tulia Akson na mawaziri, wakuu wa Mikoa na Wilaya na wengine wengi pasipo kumsahau mama yetu Asha-Rose Migiro ambaye aliipeperusha Bendera ya Taifa letu katika anga za kimataifa akiwa kama Naibu wa katibu Mkuu wa Umoja wa Mataifa na ambaye kwa sasa pia ameteuliwa kama Balozi wa Tanzania chini Uingereza, nafasi ambayo anaisimamia kwa uweledi mkubwa.
Haya yote na mengine mengi yanadhihirisha wanawake ni watu wenye nguvu na uwezo katika uongozi hivyo wapewe nafasi kwa kuwachagua kwa ajili ya maendeleo ya Taifa hili, tukiamini wazi wataendeleza  vita ya rushwa, ufisadi, dawa za kulevya na mengine mengi kwa ustawi wa Taifa letu ikiwamo kusimamia haki za wanyonge.
 
Sisi Kamati ya Amani na Viongozi wa Dini tunaendelea  kusisitiza umuhimu wa nafasi ya mwanamke katika uongozi juu ya nafasi mbalimbali kwani wanawake wana mchango mkubwa katika kuinua uchumi kama tunavyofahamu mchango wa wanawake katika ukuaji wa uchumi kwa nchi yetu na kwa Afrika kwa ujumla. 
Kamati ya Amani tunaamini wanawake wakichaguliwa katika nafasi za uongozi watakuwa na fursa ya kutunga sera na kushiriki katika vyombo vya maamuzi, hivyo basi ni wazi maendeleo na mapinduzi makubwa ya kiuchumi katika Taifa letu pendwa la Tanzania yatatokea.
 Ikumbukwe kwamba wanawake ni zaidi ya nusu ya idadi ya watu duniani hivyo ili kuutokomeza umasikini ni lazima wanawake wapewe nafasi na kushirikishwa kikamilifu katika uongozi. Biblia inasema “Wanawake watangazao habari ni jeshi kubwa” (Zaburi 68:11b) hivyo ni wazi wanayo nguvu ya kufanikisha hili.  
Lakini pia upo msemo uliozoeleka kwa wengi kwamba “kila palipo na maendeleo ya mwanaume nyuma yake yupo mwanamke” hivyo mwanamke aliyezoeleka kuwa nyuma na bado akamuwezesha mwingine kutimiza wajibu wake, ni wazi pindi akipewa nafasi ataitekeleza vizuri zaidi. 
Sasa wakati umefika mwanamke achaguliwe na kuwekwa mbele, kwani tunaamini atafanya mambo mengi na kwa ufanisi zaidi. 
Ukweli huu unathibitishwa na maandiko Matakatifu kama tunavyoweza kusoma, Mithali 14:1 “ Kila mwanamke aliye na hekima hujenga nyumba yake ; bali aliye mpumbavu huibomoa kwa mikono yake mwenyewe” Biblia inamtazama mwanamke kama ni mjenzi kuanzia ngazi ya familia. Na bila shaka sote tutakubali Taifa imara ni zao la familia zilizo imara. Quran Tukufu nayo inasema “Mwanamke ni madrasa” yaani ni chuo cha kuelimisha jamii.
Katibu Mkuu wa zamani wa Umoja wa Mataifa, Ban Ki-Moon amewahi kusema kwamba “kote duniani ubaguzi dhidi ya wanawake bado umeenea, ingawa ni dhahiri kuwa usawa kwa wanawake ni maendeleo kwa wote” 
Hii ni sawa na kusema kwamba nchi zenye usawa zaidi wa kijinsia zina maendeleo zaidi kiuchumi, na kampuni zenye wanawake zaidi kwenye bodi zao zinatengeneza faida zaidi. 
Mikataba ya amani inayowashirikisha wanawake hufanikiwa zaidi; Mabunge yenye wanawake zaidi humulika masuala mengi zaidi, ikiwamo masuala ya afya, elimu pamoja na kupinga ubaguzi na kuwasaidia watoto.
Na hata waziri wa Mambo ya Nje wa zamani wa Marekani Bi Hillary Clinton, amewahi kusema kwamba wanawake wanaposhinda, ulimwengu unashinda na hivyo ajenda mpya ya maendeleo ni lazima iwe jumuishi. 
“Ni lazima tuhakikishe kuwa wanawake popote pale wana haki ya kupata ajira, kumiliki na kurithi mali, waweze kuwa utambulisho rasmi na halali, usawa katika elimu, wawe na washiriki kama wadau katika ujenzi wa amani, kutokomeza ukatili wa kijinsia, na pia ndoa za utotoni” 
Katika hili sisi Kamati ya Amani na Viongozi wa Dini tunachukua nafasi hii kuwahimiza wanawake wenyewe kwanza kuwa mstari wa mbele katika nafasi mbalimbali za uongozi. Kwa mfano, Mheshimiwa George H. Mkuchika (Mb) Waziri wa Nchi, Ofisi ya Rais, Menejimenti ya Utumishi wa Umma na Utawala Bora, ambaye alikuwa mgeni rasmi wa Maadhimisho ya Siku ya Umoja wa Wanawake Tanzania (UWT) Wilayani Newala hivi karibuni, aliwaasa wanawake nchini akisema:  “Wanawake wasitegemee nafasi za upendeleo walizotengewa na Serikali na badala yake wachukue fomu na kuingia katika kinyang’anyiro na wanaume kugombea”
Ndugu Mgeni Rasmi kupitia wasilisho hili tumeweza kuona sura ya umaskini ni ile ya mwanamke, idadi kubwa ya wajinga wa kutokujua kusoma na kuandika duniani ni wanawake na wasichana. Mwanamke mmoja kati ya watatu kwenye nchi maskini au tajiri duniani atakumbwa na ukatili wa vipigo au kingono katika maisha yake. 
Mamilioni ya wanawake na watoto wanauzwa utumwani. Lakini matatizo yote haya yana majibu! Majibu ni kuwawezesha wanawake, na majibu yako mikononi mwetu sote kwa kuwapa nafasi katika ngazi mbalimbali za uongozi.
Kama tulivyoweza kuona mila na utamaduni, umasikini, mfumo duni, lugha dhalilishi, kutokujiamini, mifumo na itikadi ndani ya vyama vya siasa, uelewa mdogo, kutokujengewa uwezo, na kutokupewa msaada wa kutosha haya na mengine mengi yamekuwa vikwazo kwenye jamii yetu kuhakikisha kwamba wanawake wanajihusisha kwenye ngazi za maamuzi na kushika nafasi mbalimbali za uongozi. 
Hivyo basi, sisi kama Viongozi wa Dini tunaona kwamba kuna umuhimu mkubwa kuwa Wanawake ni wadau muhimu katika shughuli zote za kisiasa na maendeleo ya jamii. Idadi yao kama wapiga kura, wanachama wa vyama vya siasa, na kama wazalishaji wanaoendeleza kizazi, ni kubwa na haiwezi kupuuzwa. Kwa kuzingatia hayo, sisi Viongozi wa Dini tunatarajia na kutegemea kwamba tutumie nafasi zetu ili kuleta;
i. Kuhamasisha amani kwenye ushirikishwaji wa wanawake na katika suala zima la uchaguzi.
ii. Kuhamasisha wanawake wengi kushiriki kwenye ngazi mbalimbali za uongozi.
iii. Kuzuia migogoro isiyo ya lazima kwenye ushirikishwaji wa wanawake kwenye ngazi mbalimbali za uongozi.
iv. Kuhamasisha jamii kubadili mtazamo kuhusu wanawake kugombea nafasi mbalimbali za uongozi na kuwachagua.
Mwisho tunapohitimisha ushauri wetu sisi Viongozi wa Dini na Viongozi wa Kamati za Amani ni kuona vyama vya Siasa na Watanzania wote kwa ujumla tunahitaji kuchagua viongozi walio bora wakiwamo wanawake kwa ajili ya maslahi mapana ya Taifa letu kwa vizazi vya sasa na vitakavyokuja. 
Katika kufanikisha hayo tunasihi ushirikiano kutoka vyama vyote vya siasa kuendelea kutanguliza uzalendo wa nchi yetu kwanza na maslahi mapana ya Taifa letu hili pendwa. 
Sote kwa pamoja tukemee na kuwaelimisha wafuasi wetu kuondokana na vitendo vyote vyenye kuashiria uvunjaji wa Amani. Ugomvi, matusi, kejeli hayo yote sio utamaduni wetu. Tuendeleze utamaduni wa kuhojiana kwa hoja!
 Katika sura 16 Aya ya 125 (Surat Nahil) Qur’an Tukufu inasema “Ita katika njia ya mola wako kwa hekima na mawaidha mazuri na jadiliana nao kwa namna iliyo nzuri zaidi” 
Hivyo tunasisitiza tena na kuvisihi vyama vyote vya siasa, kwamba viwahimize Watanzania wote kwa pamoja pasipo kujali itikadi zetu, dini zetu, makabila, rangi zetu n.k bali kutanguliza mbele Uzalendo wa nchi yetu! Kwani lazima tufahamu Tanzania yetu inathamani zaidi kuliko tofauti zetu.
Tunatoa rai kwa kila mdau wa uchaguzi ikiwemo Tume ya Uchaguzi, vyama vyote vya siasa na wanachama wao, vyombo ya ulinzi na usalama hasa Jeshi la Polisi na Taasisi nyingine zote zinazohusika kuona zinaendesha shughuli zao kwa amani, upendo, kweli na haki kwa mujibu wa Sheria, kanuni na taratibu tulizo jiwekea ili kuona kuwa tunakuwa na uchaguzi wa amani na utulivu wenye kudumisha umoja na mshikamano wa Taifa letu pendwa la Tanzania. 
Tunaendelea kusihi katika mambo yote yatakayotendeka ni muhimu  maslahi ya Taifa yatangulizwe kwanza bila kujali maslahi ya mtu binafsi au ya makundi yetu madogo yaliyo mazao ya itikadi, falsafa au imani zetu. 
 
Katika wakati wote Sisi Viongozi wa Dini tutaendelea kudumu katika Sala na Dua ili Mungu atuvushe salama na tukiwa wamoja wenye amani na upendo.  
 
“Dini mbalimbali, Amani  na Upendo, Amani na upendo, Dini mbalimbali” !.
 
HAKI YA MWANAMKE KATIKA UONGOZI NA USHIRIKISHWAJI
 
 
NAFASI YA MWANAMKE KUELEKEA UCHAGUZI MKUU WA 2020 KATIKA MUSTAKABALI WA HAKI, HESHIMA NA UTULIVU KATIKA KUCHAGUA VIONGOZI BORA 16/09/2020.
HAKI YA MWANAMKE KATIKA UONGOZI NA USHIRIKISHWAJI.
Haki ya mwanamke katika uongozi na ushirikishwaji, kipengele chenye mzozo na rai tofauti. Ama haki za mwanamke katika ushirikiswaji, ni jambo lililo wazi  katika umuhimu na kubadilika kwake katika uislam, bali hata linavodhihiri kwa uwazi kabisa katika maisha ya mwanadam ambapo wanawake anachukua nafasi yake kama mshirika mkubwa wa wanaume katika ujenzi wa familia, jamii na taifa. 
Mwenyezi mwungu mtukufu anatuwekea wazi katika qur’ani juu ya ushirikishwaji katika utekelezaji wa majukumu mbalimbali pale aliposema katika suratil tawbah 9;71 kuwa;
Tafsiri yake;
Na waumini wanaume na waumini wanawake wap kwa wao ni wasimamizi huamrisha mema na hukataza maovu na husimamisha swala na hutoa zaka na humtii mwenyezi mungu na mtume wake. Hao mwenyezi mungu atawarehemu.  Hakika mwenyezi mungu ni mtukufu mwenye hekima.
Yaani waumini wanaume na waumini wanawake wao kwa wao wanapendana na kusaidiana (kushirikiana) kwa mujibu wa imani wanaamrisha yanayoamrishwa na dini yao, na wanakatazwa wanayokatazwa. Wanasimamisha swala kwa nytajati zake na wanatoa zake kuwapa wanaostahiki kwa wakati wake. Wanatii anayowaamrisha mwenyezi mungu ntume wake na wanayaepuka  anayokataza mwenyezi mungu na mtume wake. Na hao ndio watakaokuwa chini ya rehema ya mwenyezi mungu kwa kuwa mwenyezimungu ni muweza wa  kuwalinda kwa rehema na mwenye hekima katika upaji.
 
Ni dhahiri kuwa pamoja na kuwepo aya nyingine zinazoonyesha kuwepo haki za mwanamke wa kiislamu katika ushirikiswaji, ayah ii inaliweka wazi hilo pale (SW)  anapoliweka wazi fungamano la mwanamke na mwanamme katika kuyaendea mambo ya msingi yanayohusiana na lengo la kuumbwa kwao ikiwa katika ayah ii basi ushiriki wake katika mambo mengine akiwa mwenza  wa mwanamme uko wazi kiimani na kiakili.
Kuna rai tofauti juu ya haki ya mwanamke katika uongozi  wa jumla na utawala, kuna makundi mawili yenye hoja za msingi katika  hiki kundi  linaloondoa ustahiki wa wanawake katika uongozi na utawala (uongozi mkuu), na kundi linaloona  kuwa mwanamke ana haki ya uongozi wa jumla ukiondoa utawala (ukhalifa).
Msingi wa tofauti ni namna walivyoifahamu aya ya 34 ya suratin nisaa 4;34 pale mwenyezi mungu aliposema;
Tafsiri;
Wanaume ni msimamizi wa mwanamke, kwa kufadhilishwa na mwenyezi mungu baadhi yao juu ya baadhi na kwa mali yao wanayotoa.
Kundi la kwanza  linaona kuwa usimamizi na uongozi wa jumla ni kwa wanaume tu, kutokana na ubora wa mazingatio, rain a ziada ya nguvu za kinafsi na kutabia walizonazon, na wanawake ni dhaifu katika hayo na wanatawaliwa mbele ya wanaume wala hawashirikiswi katika uongozi.
Kundi hili linadai pia kuwa hata kama aya huu itahusishwa na mambo ya familia, hoja itabaki palepale kuwa kama mwanamke mwenye kushindwa kiongoza familia yake moja basi ni dhahiri kuwa atashindwa pia kuyaongoza na kuyasimamia mambo ya watu (jamii ) na kutatua matatizo yao.
 
Hata hivyo kundi la pili linaona kuwa mahusiano baina wanaume na wanawake katika mambo ya jumla ni mahusiano ya kiutawala na kuwa daraja na usimamizi wa wanaume uliotajwa ndani ya qur’aan 4;34 haukulenga isipokuwa katika  maisha ya ndoa ambayo yanalazimisha katika kuendesha kwake kuwepo kidato cha mwisho katika ngazi ya uwajibikaji na utoaji maamuzi  yao ni wanaume . na kuondolewa wanawake katika maswala ya uendeshaji wa familia hakumaanishi  kutoweza  kwake, bali ni mgawanyo wa majukumu kwa Yule anayestahiki zaidi (aliye bora zaidi katika utekelezaji) kwamfano wakati jukumu la usimamizi wa jumla nkupewa wanaume, jukumu la kuchukua ujauzito na malezi ya motto limewekwa kwa mwanamke kimaumbile kwa kuwa yeye ndiye mtekelezaji bora wa jukumu hilo.
Kundi hili linajenga hoja kwa kuitumia surati tawbah 9;71 ambayo tumeitaja mwanzoni katika suala suala la usimamizi wa jumla ni suala la kushirikiana baina ya wanaume na wanawake.
Kama vile wamehilatilafiana makundi ayo mawili  katika kuielewa aya ya 34 ha suratin Nissa, wamehitilafiana  pia katika kuielewa hadithi ilipomfikia mtume  S.A.W) habari kuwa watu wa ajemi wamemtawalisha binti wa mfalme wao mtume (S.A.W) ALISEMA ‘hawatafaulu watu waliolitawalisha jambo lao kwa wanawake’.
Katika kuielewa khadithi hii kundi la kwanza linaiona kuwa linawakusanya wanawake wote wa aina zote za uongozi, katika kundi la pili  linaiona kuwa  khadithi hii inahusiana zaidi na utawala wa kiajemi  kama dua mbaya kwao. Lipo kundi jengine lililoiona khadithi hii kuwa inalenga uongozi  mkuu (ukhalifa) na si uongozi katika Nyanja nyengine.
HITIMISHO LA MADA YA UONGOZI NA USHIRIKISWAJI
Pamoja kuwepo kwa makundi mawili katika swala la haki ya mwanake wa kiislamu katika kuongoza na kwamba kundi moja  linaongelea kuwa mwanamke wa kiislamu hana haki ya kuongoza  katika ngazi yoyote ile, na kundi la pili  linaona kuwa mwanamke anahaki ya kuongoza katika nafasi za chini, na kwamba hana haki ya kuongoza katika ngazi ya juu ambayo ni ya mwisho katika uongozi.
 
Mtazamo wtu tunaona kuwa tifauti hiyo inakuwa na maana katika jamii ambayo ni ya kiislamu na inaongozwa kwa msingi ya kiislam. Ama katika jamii  amabyo ni ya kislamu amabyo mfumo wa maisha , utawala na uongozi si wa kiislamu mtazamo wetu  utakuwa tofauti na mitazamo  miwili hiyo, na mfano wa hilo ni jamii yetu ya watanzania ambayo makundi ya imani na itikadi tofauti jambo ambalo imepelekea utaratibu wa maisha hata muundo wa utawala  kutokwenda kwa mtazamo wa dini kwani katiba ya jamuhuri ya muungano wa Tanzania inasema tunanukuu ‘ bila liathiri sheria zinazohusika na jamuhuri ya muungano kazi ya kutangaza dini  kufanya ibada na kueneza dini itakuwa huru na jambo la hiari  ya mtu binafsi  na shughuli na uendeshaji wa jumuiya za dini zitakuwa nje ya shughuli za mamlaka ya nchi.
Msimamo wa nchi na utaratibu wake  unaonekana kuwa uwazi katika kifungu hicho cha katiba kwahoyo swala la uongozi kwa mwanamke wa kislamu katika jamii kama hii linakuwa ni dharura.
Tumeona hapo nyuma kwamba uongozi kwa mwanamke wa kiislamu katika jamii kama hii utakuwa ni jambo la dharura na uislamu katika mafunzo yake unaitambua swala la dharura . amesem mwenyezi mungu mtukufu katika surat al baqara (2/173) ‘atakaye lazimika hali ya kuwa si mwenye kufanya uovu na si mwenye kuvuka mipaka  hapana madhambi juu yake kwa hakika mwenyezi mungu ni msamehevu sana mingi wa rehema’ ayah ii katika sehemu yake ya mwanzo ilikuwa inazungumzia kuhusu kuharamishwa kwa jina lisilokuwa la mwenyezi mungu sasa Yule ambaye hapatakuwa mbele yake zaidi ya vitu hivyo na akawa anapoteza maisha ya nafsi yake huyo anaruhusiwa kuvitumia hivyo kwa kiasi cha dharura yake.
Na mwenyezi mungu mtukufu katika kuonyesha wepesi wa dini hii, amesema katika surati Al-Hajj aya ya 78 na hakufanya mwenyezi mungu juu yenu  katika dini ugumu wowote ; kutokana na wepesi wa dini, na kutokana na dharura hiyo mwanamke muisilamu katika nchi kama hii atachukua nafasi yake katika uongozi ili kwenda sambamba na utaratibu wan chi hii, na ndiyo maana hata watu wa somo la usuul fiqhi wamesema katika kanuni hii (dharura huhalalisha yaliyozuiwa) (ugumu huleta wepesi) (madhara huondolewa).
 
Amesema sayyed qutubi katika tafsiri yake iitwayo fiidhwilla AL-Quaran juzuu ya pili uk 157 ‘ pamoja na hayo uislamu unafanya hesabu ya mambo ya dharura na kwa hiyo unayaruhusu yale yaliyozuiliwa na inahalaliswa yaliyogharamishwa, isipokuwa msingi uwo kwasababu ya kuwa umeachiwa, unao uwezo wa kuyachukua yaliyoharamishwa mengine katika mawanja yote’.
 Kwa msingi huo mwanamke wakislamu anayo haki ya kushiriki katika uongozi kwa mtazamo huu.
Ushirikiswaji wa wanawake
Ulipokuwa uisilamu ulipoutambua utu wa mwanamke na kumpa haki zake zote ambazo anastahiki na ambazo zimewekwa wazi huko nyuma kupitia aya na hadithi mbalimbali za mtume mohammad (S.A.W) mwanamke si nusu ya jamii tu, bali ni mama wa jamii, kwani kuporomoka kwa wanawake  ni lazima kutasababisha kuporomoka kwa umma wote, kwani hapana mwanamme yoyote isipokua ni motto wa mwanamke nay eye ndie aliyemtunza na kumlea katika hatua ya kwanza, na kwa kiasi cha shakhasia yake na ubora wake na elimu yake na kuzingatiwa kwake inajengeka hali ya utu wake na nafasi yake katika maisha.
Historia ya uislamu imetuifadhi namna nyingi za kushirikishwa kwa mwanamke katika mambo mbalimbali ya maendeleo, wakwanza kumwamini mtume  ( SAW) wakati alipopatwa na fazaa kwa kujiwa na malaika jibrili kwa mara ya kwanza, na pia  aliweza kuitumia mali yake katika maendeleo ya dawa ya kiislamu, alisema mtume katika kuthibitisha hilo  ‘aliniamini bi khadija wakati waliponikanusha watu wengine na alinisaidia kwa mali yake wakati waliponinyima watu wengine.
 
Na mwanamke ndiye aliyemfanya omar bin AL-khattab, aingie katika uislamu, naye ni dada yake wakati alipomkuta anasoma Qur’aan, na mwanamke ndiye wa kwanza kuoendekeza kwa mtume (SAW) atengenezewe mimbari msikituni kwani pamepokewa kutoka na jabir kwamba mtume (SAW) atengenezewe mimbari msikitini kwani pamepokewa kutoka na jabir kwamba  mtume  (SAW) alikuwa akitoa hotuba zake akiwa amesimama katika kigogo cha mtende, akaambiwa na mwanamke ‘ewe mjumbe wa mwenyezi mungu hivi sikutengenezei  kitu ambacho ukalia kwani mimi ninamtoto ambaye ni seremala’ akasema mtume (SAW) iwapo tutapenda akatengeneza Yule mwanamke mimbari . imethibitishwa na abou Dawoud na tirmidhy na annasai.
Mwanamke pia alishirikishwa katika uwanja wa vita, na kufanya yale ambayo anayaweza.
Imepokea kutoka kwa jaafar bin Muhammad kwa baba yake kwamba najdah alimwandikia ibni abbasi kuhusu mbmbo matano; ibnu Abbas akasema ‘lau si kwamba nitakuwa nimeficha elimu nisingekuandika’ Najdah akasema ‘ama baada ya hayo nataka unieleze je  alikuwa mjumbe wa mwenyezi mungu (SAW) alipigana vita akiwa pamoja na wanawake?  Na je alikuwa anawapangia fungu katika ngawira? Ibn Abbas akajibu ; kwa hakika alikuwa akipigana vita hali ya kuwa yupo pamoja na wanawake hali ya kuwa wanawatibu majeruhi ma wanapewa ngawira’.
Tunajifunza kutokana na maswali najdah akimuuliza ibn Abbas na majibu yake kwamba uislamu ulimshirikisha mwanamke katika mambo mengi ya jamii isitoshe kuwa mtume (SAW) alimshirikisha mwanamke katika mazingira ya hatari sana  mazingira ya vita, mahali ambapo kwa mtazamo wa kawaida pengine ingeonekana kuwa mazingira hayo hayaendi sambamba na hali ya mwanamke, isipokuwa kwa mtazamo wa uislamu, kupitia utekelezaji wa mtume alikusudia  kuonyesha kwa matendo namna ambayo mwanamke anayo haki ya kushirikishwa katika mambo yote.
 
                                                    SHK.ALHADM.SALUM
                    SHK WA MKOA D’SALAAM/M/KITI KAMATI YA AMANI.

User Rating: 0 / 5

Star InactiveStar InactiveStar InactiveStar InactiveStar Inactive
Dar es Salaam Agost 12, 2020. Wakati macho na masikio ya Watanzania yakiisubiri kwa hamu Oktoba 28 ambayo ni siku ya uchaguzi mkuu nchini, Chama cha Wanahabari Wanawake Tanzania (TAMWA) Shirika la Wanawake katika Sheria na Maendeleo Barani Afrika (WiLDAF) pamoja na Global Peace Foundation (GPF) tunaoa mapendekezo kwa  vyama vya siasa na wadau wengine wa uchaguzi, kuondoa changamoto zote zinazochagiza ushiriki duni wa wanawake katika siasa. 
Uchaguzi Mkuu unafanyika wakati ambapo kati ya wagombea 16 waliochukua fomu kugombea urais, wapo wanawake wawili mpaka sasa ambao ni Queen Cathbert Sendinga wa Chama cha ADC, na Cecilia Augustino wa Demokrasia Makini walioteuliwa na vyama vyao kuwania nafasi ya urais katika uchaguzi huo. Kadhalika, wapo wanawake watano wanaowania umakamu wa Rais, katika mchakato huu wa uchaguzi. 
Lakini TAMWA, WiLDAF  na GPF  taasisi ambazo malengo yake ni kuwepo kwa jamii yenye amani, inayoheshimu haki za binadamu kwa mtazamo wa kijinsia, na amani zimeona ni vyema kuikumbusha jamii, wadau wa masuala ya siasa na ya jinsia  kuzifanyia kazi changamoto zinazochangia ushiriki duni wa wanawake katika siasa. 
 TAMWA WiLDAF  na GPF  chini ya ufadhili wa Mfuko wa Maendeleo ya Wanawake Afrika, (AWDF) kupitia mradi wa ‘Wanawake Sasa’ imeendesha midahalo mbalimbali ya wanawake kutoka  vyama vya siasa ,wakiwamo wanawake wanasiasa, viongozi wa dini na kubaini kuwa bado kuna changamoto  zinazopelekea ushiriki mdogo wa wanawake katika siasa.
Midahalo tuliyofanya  katika  kanda za Dodoma, Arusha, Zanzibar na Dar es Salaam, iliibua changamoto zinazowakabili wanawake katika siasa ikiwamo lugha dhalilishi  zinazowavunja moyo wanawake  wanaogombea au walio katika nafasi za uongozi pamoja na familia zao kuwania nafasi mbali mbali za uongozi.
Wanawake wanaogombea nafasi za uongozi, hukutana na changamoto  ya lugha dhalilishi wakati wa kampeni, na hata wakati wa utendaji wao wa kazi ili tu kuwakatisha tamaa na kuwarudisha nyuma. Kama tunataka uchaguzi wa haki na wa kidemokrasia, ni muhimu kwa tume ya uchaguzi na vyombo vya usalama kupiga marufuku na kutoa adhabu kali kwa wanasiasa watakaotoa lugha hizi dhidi ya wanawake, Rose Reuben, Mkurugenzi TAMWA.
Katika midahalo hiyo, TAMWA , WiLDAF  na GPF  tumebaini kuwepo kwa rushwa ya kifedha katika shughuli za kawaida za siasa na hasa wakati wa chaguzi mbali mbali za ndani ya vyama, serikali za mitaa na uchaguzi mkuu. Hii ni pamoja na tabia za wajumbe wanaotegemewa kupiga kura kuwa na hulka ya kudai au kujenga mazingira ya kupewa kitu kidogo ili waweze kutoa ushirikiano kwa mgombea. Hii inaathiri  wanawake ambao wengi wao hawana kipato cha kutosha hasa wanawake vijana. 
 
Pia tumebaini uwepo wa vitendo vya kuomba au kutengeneza mazingira ya rushwa ya ngono kwa baadhi ya wanaume wenye dhamana za kusimamia michakato ya chaguzi au mamlaka ndani ya vyama vya siasa.Changamoto hiyo husababisha wanawake kudhalilishwa na kuharibiwa ndoto zao za kisiasa na wakati mwingine familia au wenzi wao kuwazuia kushiriki katika siasa. 
Hayo na mengine mengi, yanachangia wanawake, kuvunjika moyo na hivyo kutoshiriki shughuli za siasa au kukosa nafasi za uongozi pale wanapokuwa na msimamo wa kutotoa rushwa.
Katika hili tunapenda kutoa rai kwa wanawake wenzetu kukataa kabisa kudhalilishwa na kutojihusisha na vitendo vya rushwa ya fedha au ngono na pia tunashauri jumuiya za wanawake ndani ya vyama vya sisasa kuvunja ukimya na kuhakikisha hoja za rushwa katika siasa inazungumzwa katika kila vikao vya jumuiya na vikao vingine muhimu. 
Pia tunaviomba vyama vya siasa viweke utaratibu madhubuti na wa siri wa kutoa taarifa za vitendo hivi na kuwe na kamati huru ndani ya vyama zisizofungamana na yeyote zitakazoratibu upokeaji, ufuatiliaji na utoaji adhabu kwa wale ambao bado wanaendekeza vitendo hivi vya kuwadhalilisha wanawake.   
Changamoto nyingine zilizoibuliwa katika midahalo hiyo,  ni Ilani za vyama vya siasa ambazo hazitoi nafasi kwa wanawake kuwa viongozi na kupata nafasi ya kugombea katika majimbo. Tumebaini wanawake wengi wanashindwa kushiriki uchaguzi kwa kutopata baraka hii kuanzia ndani ya vyama.
Wakati huo huo tunavitaka, vyama hivyo viwachague wanawake wenye uwezo wa kisiasa na wa uongozi.
Tunapenda kuvipongeza vyama vya siasa ambavyo vimetoa nafasi za wanawake kugombea nafasi za udiwani na ubunge na hata urais katika kura za maoni. 
“Mwaka huu wanawake wengi wamejitokeza. Tungependa kuviomba vyama vya siasa kuhakikisha kuwa wale wanawake wenye uwezo wasimamishwe kugombea nafasi hizo na tunawaomba wananchi wote kuwachagua wanawake waliosimamishwa kugombea nafasi za ubunge na udiwani, na wengine wapewe nafasi za teuzi mbalimbali Mkurugenzi wa GPF , Martha Nghambi. 
Tunavikumbusha vyama kuendelea kutoa mafunzo ya kuwajengea uwezo wanawake ambao hawakupata nafasi mwaka huu ili waweze kusimama na kugombea chaguzi zijazo ndani ya vyama vyao, serikali za mitaa na uchaguzi mkuu wa mwaka 2025.
Kadhalika tunapenda kuwaasa wanawake kuepuka kugawanywa na zile kauli kuwa, hawapendani badala yake waendelee kushirikiana na kupeana fursa mbalimbali za kisiasa, kiuchumi na masuala ya kijamii.
Kauli hizi za kuwa wanawake hatupendani si za kweli bali zimekuwa zikitumika katika jamii kuwagawa wanawake kuwania nafasi mbalimbali za uongozi, Reuben 
Tunatarajia kuwa serikali, wadau wa siasa, vyombo vya usalama vitazingatia kauli ya Rais wa Jamhuri ya Muungano wa Tanzania, DK John   Pombe Magufuli ya kuwepo kwa mazingira wezeshi kwa wanawake katika uchaguzi mkuu na katika nafasi za uongozi na maamuzi. Pia tunampongeza kwa kuendelea kumchagua Mama Samia Suluhu kuwa mgombea mwenza katika uchaguzi mkuu ujao. 
 
Tungependa kumalizia kwa kusisitiza kauli zilizotolewa na Rais, viongozi wa vyama mbali mbali na tume ya taifa ya uchaguzi kuwa uchaguzi wa mwaka huu utakuwa ni  huru, haki na wa amani. 
Tunawakumbusha wagombea wote kuhakikisha kuwa hawatoi kauli zozote za uvunjifu wa Amani, kuchochea vurugu, kuwagawa watu kwa dini au makabila yao au matusi na udhalilishaji wa kijinsia kwa wagombea wengine. 
Wakati huo, TAMWA, WiLDAF na GPF  inaiomba Tume ya Taifa ya Uchaguzi (NEC) kuendelea kuhimiza uchaguzi huru, wa haki na usawa na kutengenezwa kwa mazingira sawa ya ushindani kwa wagombea wote.
Mungu Ibariki Tanzania, Mungu Ubariki Uchaguzi Mkuu wa Octoba 2020. 
 
Rose Reuben Mkurugenzi Mtendaji - TAMWA
Anna Kulaya Mkurugenzi - WILDAF
Martha Nghambi Mkurugenzi - GPF

User Rating: 0 / 5

Star InactiveStar InactiveStar InactiveStar InactiveStar Inactive

Chama cha Wanahabari Wanawake Tanzania, (TAMWA) kinaungana na Watanzania wote kuomboleza kifo cha Mwanadiplomasia Mkongwe, mwanahabri mahiri na Rais wa awamu ya tatu, Benjamin William Mkapa.

TAMWA inakumbuka mchango wa Rais Mstaafu Hayati BWM katika kuijenga nchi hii kisiasa, kiuchumi na kiutamaduni lakini hasa inaukumbuka mchango wake katika kujenga na kuhimiza usawa jinsia, kisheria, kisera na katika ngazi za maamuzi.

User Rating: 4 / 5

Star ActiveStar ActiveStar ActiveStar ActiveStar Inactive
Dar es Salaam, Oktoba 1, 2020. Chama cha Wanahabari Wanawake Tanzania (TAMWA) kina furaha kubwa kuutambulisha umma wa Watanzania, kuanza kwa utekelezaji wa mradi wa ‘Wanawake Wanaweza’, unaofadhiliwa na Shirika la Umoja wa Mataifa linalohudumia Wanawake (UN-Women).
Hii ni fursa adhimu kwa TAMWA ambayo baadhi ya malengo yake makuu ni utetezi wa haki za wanawake na watoto, kuongeza ushiriki wa wanawake katika uongozi, kuondoa mifumo kandamizi inayochochoea ukatili kwa makundi hayo maalum, kwa kutumia vyombo vya habari. 
Hivyo basi jukumu  la TAMWA  katika mradi huu ni kuongeza uelewa kwa umma kuhusu umuhimu wa ushiriki wa Wanawake katika siasa na katika uongozi na madhara ya magonjwa ya mlipuko kama Covid-19 kwa wanawake na wasichana.
“Katika kufanikisha lengo kuu la mradi huu, TAMWA itawajengea uwezo wanahabari  katika kuripoti habari za jinsia na ufuatiliaji wa ushiriki wa wanawake katika uongozi na siasa,Rose  Reuben, Mkurugenzi Mtendaji, TAMWA. 
Kadhalika ili kufanikisha hayo, TAMWA itaendesha midahalo ya kihabari kwa ajili ya kuongeza uelewa kwa jamii kuhusu umuhimu wa ushiriki wa wanawake katika siasa na uongozi. 
Mikoa 16 ambayo ni Dar es Salaam, Pwani, Morogoro, Dodoma, Singida, Tabora, Shinyanga, Mwanza, Mara, Mbeya, Ruvuma, Lindi na Mtwara, Wilaya 112 za mikoa hiyo na kata 458, ndiyo maeneo  yatakayotumika kama sampuli ya utekelezaji wa malengo ya mradi huu.
Kama ilivyoelezwa hapo juu, kuwa malengo ya mradi huu yatatimizwa kwa kutumia vyombo vya habari, hivyo basi TAMWA itashirikiana na wadau wake wakuu ambao ni vyombo vya habari, zikiwamo runinga 10, redio za kijamii 50, radio za masafa marefu 10 , magazeti 20 na mitandao ya kijamii, ili kuifikia jamii. 
TAMWA inatambua kuwa ushiriki wa wanawake katika nafasi za maamuzi (hasa ya kisiasa) bado ni mdogo, hali ambayo inakinzana na azma ya kujenga jamii isiyokuwa na ubaguzi kama ilivyobainishwa kwenye dira ya Taifa 2025, Katiba ya Jamuhuri ya Muungano wa Tanzania 1977, pamoja na sheria mbalimbali za nchi. 
Kwa mfano, ripoti ya Tume ya Taifa ya Uchaguzi, (NEC: 2016) inaonyesha kuwa, asilimia 17 ya mawaziri ni wanawake, makatibu wakuu wanawake ni asilimia 11, wakuu wa mikoa ni asilimia 23, wakuu wa wilaya ni asilimia 28 na hii inaonyesha kuwa bado nafasi ya mwanamke katika ngazi za uongozi ni mdogo. 
“Hata hivyo, bado tunaupongeza  uongozi wa awamu ya tano, kwa mara ya kwanza alichaguliwa Makamu wa Rais mwanamke nchini, Mama Samia  Suluhu Hassan Reuben
Hivyo basi katika kipindi cha mwaka mmoja wa utekelezaji wa mradi huu, TAMWA, inatarajia kutumia nyenzo zake muhimu kuongeza uelewa kwa jamii na kuhakikisha wanawake wanaonekana kuwa viongozi halali na madhubuti katika jamii yetu Reuben 
Kama tulivyoainisha awali, kuwa wadau ni muhimu katika utekelezaji wa mradi huu, hivyo wadau wengine tutakaowashirikisha ni Chuo Kikuu cha Dar es Salam, kitivo cha Sayansi ya Jamii, Mtandao wa Jinsia Tanzania (TGNP), Shirika la  Wanasheria Wanawake na Maendeleo Afrika, (WILDAF), Viongozi wa dini na Mtandao wa radio za kijamii nchini (TADIO), Wizara ya Habari na Wizara ya Afya.
Wengine ni Mtandao wa Wanawake Viongozi Afrika (AWLN) na machampioni wa GEWE, Viongozi wa kimila, Kituo cha Demokrasia nchini(TCD).
 Hawa wote ni wadau ambao TAMWA itafanya nao kazi wakati wa utekelezaji wa mradi huu, na kwa nafasi yao watakuwa na mengi ya kuishirikisha TAMWA na umoja huu ndicho chanzo cha mafanikio ya utekelezaji wa mradi huu, Rose Reuben
TAMWA ambayo kiini chake ni wanahabari, inatarajia kushirikiana na vyombo vya habari ili kufikisha hii ajenda ya ushiriki wa wanawake katika siasa na katika uongozi kwa jamii, tukiamini kwamba, wanawake ni nguzo muhimu katika maendeleo ya jamii. 
Viongozi wa dini, taasisi za habari, taasisi za jinsia, ambazo TAMWA inakwenda kushirikiana nazo, ni nguzo muhimu katika kufanikisha adhma kuu ya mradi huu,Reuben.
Bila kuwasahau viongozi wa kimila na viongozi wa mikoa, wilaya na kata mbalimbali ambazo tutazifikia, TAMWA inatarajia ushirikiano mkubwa kutoka kwao. 
Mkurugenzi Mtendaji 
Rose Reuben
TAMWA.
 

User Rating: 0 / 5

Star InactiveStar InactiveStar InactiveStar InactiveStar Inactive
Oktoba 11, 2020, Dar Es Salaam. Chama cha Wanahabari Wanawake Tanzania (TAMWA), kinaungana na watanzania, pamoja na watu wote ulimwenguni kuadhimisha Siku ya Kimataifa ya Mtoto wa Kike. 
Kauli mbiu kitaifa kwa mwaka huu, inasema; Tumuwezeshe mtoto wa kike, kujenga taifa lenye usawa na kimataifa, kauli mbiu inasema: Sauti yangu, ni mustakabali wetu wa usawa.’ 
 
Kila mwaka ifikapo Oktoba 11, dunia huadhimisha siku hii ili kukumbushana madhila wanayopitia watoto wa kike na kuikumbusha jamii nguvu iliyomo kwa watoto hao.
Kwa mfano ripoti ya Shirika la Umoja wa Mataifa linalohudumia watoto(UNICEF) inaeleza kuwa watoto wa kike milioni 12 huolewa kabla ya kufikisha umri wa miaka 18 kila mwaka?
 
Watoto wa kike takribani milioni 6 hadi 17 duniani kote hawajapata nafasi ya kwenda shule na inaelezwa kuwa watoto wa kike milioni 15 duniani, wenye umri wa kuanzia miaka 15 hadi 19 wameathirika kisaikolojia kutokana na manyanyaso ya ukatili wa kijinsia, ikiwamo kubakwa, vipigo na udhalilishaji wa kingono.  
Takwimu zinazojitokeza zinaonyesha kuwa tangu kuzuka kwa COVID-19, unyanyasaji dhidi ya wanawake na wasichana (VAWG), na hasa unyanyasaji wa nyumbani, umeongezeka kwa kasi.
 
TAMWA ni shirika lisilo la kiserikali, lilioanzishwa mwaka 1987  kwa lengo la kutetea haki na ustawi wa wanawake na watoto, kupitia vyombo vya habari hivyo basi, wakati tunaadhimisha siku hii, tunaiasa jamii kuacha mifumo yote inayomkandamiza mtoto wa kike na badala yake tunahimiza taifa lenye amani,  linalozingatia ulinzi kwa watoto wa jinsia zote. 
 
Kupitia miradi mbalimbali tuliyofanya, TAMWA imebaini kuwepo kwa mifumo kandamizi kwa watoto wa kike, mifumo hiyo imepelekea baadhi ya jamii kukumbatia vitendo vya   ubakaji, ulawiti, ndoa za utotoni, manyanyaso kutoka ndani ya familia, kunyimwa haki ya kupata elimu na kugubikwa na mzigo wa majukumu ya kazi za nyumbani. 
 
Changamoto hizi na nyingine nyingi, zimechangia mtoto wa kike kukosa fursa ya elimu, kuathirika na maradhi, kuathirika kisaikolojia na kukosa nafasi yake ya kufurahia utoto wao kutokana na mimba za utotoni na ndoa za utotoni. 
 
Taifa lenye amani ni lile linalothamini haki za watoto, ikiwamo haki ya kuishi kwa furaha, kupata huduma za msingi ikiwemo huduma ya afya, elimu na amani. 
 
Kwa mujibu wa takwimu za madawati ya jinsia ya hapa nchini imebainika kuwa mimba za utotoni ziliongezeka kwa kasi wakati wa likizo ya miezi mitatu  mwaka huu iliyosababishwa na mlipuko wa virusi vya corona. 
Hivyo basi, TAMWA inaiomba serikali kuandaa utaratibu wa ulinzi, utoaji taarifa na ufuatiliaji kwa watoto hasa wakati wa dharura za milipuko ya magonjwa au majanga kama Covid-19 ili kuepusha madhara yanayoweza kuzuilika.
 
Wakati huo huo takwimu za uhalifu kutoka Ofisi ya Taifa ya Takwimu(NBS) zinaonyesha kuwa, katika kipindi cha Januari hadi Desemba 2016 jumla ya kesi 10,551 za uhalifu dhidi ya watoto ziliripotiwa katika vituo vya polisi, ukilinganisha na kesi 9,541 kuanzia Januari hadi Desemba 2015. Uhalifu huo ni pamoja na ubakaji, utelekezaji wa watoto, wizi wa watoto, ukeketaji na mashambulio ya kudhuru mwili.
 
“TAMWA tunaomba wazazi, walezi na watoto wa kike,wanaofanyiwa ukatili, wavunje ukimya, kwani zipo asasi, taasisi na vyombo vya serikali ambavyo wanaweza kuvitumia kuripoti matukio ya ukatili wa kijinsia 
Ndiyo  maana kauli mbiu ya kimataifa ya mwaka huu inasema, sauti yako, ni mustakabali wetu wenye usawa. 
Tunasisitiza serikali ijenge mifumo imara ya utoaji taarifa ili tujue kwa kina sababu na kiwango cha ukatili huu. Kwa kufanya hivi tutapata mifumo bora ya kukabiliana na ukatili dhidi ya watoto nchini .
 
Tukumbuke kuwa, watoto hawa, wakiwamo wa kike ni taifa la kesho, hivyo basi wanapoharibiwa misingi bora ya maisha, tunakwenda kuharibu mustakabali wa taifa, Joyce Shebe, Mwenyekiti wa TAMWA.
 
Hatutaweza kupata wafanyabishara, wakulima, mawaziri, wabunge, wakurugenzi na viongozi bora wanawake, iwapo watoto wa kike wa sasa  watabakwa, watapata mimba, wataozwa katika umri mdogo, watashambuliwa na kunyanyaswa. 
 
Tuna taarifa kuwa ukatili kwa watoto unafanywa na watu wa karibu sana, wapo wazazi, walezi wanaochochea au kuchangia kwa namna moja ama nyingine ukatili kwa watoto wa kike, ikiwamo kuwaozesha, kuwabaka, kuwaumiza miili yao na kuwazuia kupata elimu, tunakemea haya na tunataka serikali iendelee kuwachukulia  hatua kali wazazi/walezi wa aina hii, Shebe.
 
TAMWA Bado tunakumbusha umuhimu wa mabadiliko ya sheria ya ndoa ya mwaka 1971 tukiamini kuwa, mtoto wa kike mwenye umri chini ya miaka 18, bado hajapevuka vya kutosha kumudu majukumu ya ndoa na kubeba ujauzito. 
 Tunahimiza zaidi elimu kwa mtoto wa kike, fursa ya kusikilizwa, haki ya kupata huduma za afya na zaidi hasa mtoto wa kike na nafasi sawa na mtoto wa kiume, Shebe.
 
 Tunaipongeza serikali, chini ya Waziri wa Afya, Maendeleo ya Jamii, Jinsia, Wazee na Watoto, Ummy Mwalimu kwa jitihada za ulinzi na afya kwa watoto wa kike Tanzania. 
TAMWA bado tunaishikilia kauli yetu isemayo: Mtoto wa mwenzio, ni wako, mlinde na nirudie kauli mbiu ya mwaka huu ambayo inasema Sauti yangu, ni mustakabali wetu wa usawa.
 
Watoto pazeni sauti zenu mara tu mnapoona dalili za kufanyiwa ukatili.
 
Joyce Shebe
Mwenyekiti, TAMWA

Search